ހއ. އަތޮޅު ހޮސްޕިޓަލްގެ އައިސީޔޫގައި ފުރަތަމަ ފަހަރަށް ބަލިމީހަކަށް ހިދުމަތްދީފި
ހއ. ދިއްދޫގައި ޤާއިމްކޮށްފައި ހުންނަ ހއ. އަތޮޅު ހޮސްޕިޓަލްގެ އައިސީޔޫގައި ފުރަތަމަ ފަހަރަށް ބަލިމީހަކަށް ހިދުމަތްދީފި އެވެ.
މި ހޮސްޕިޓަލްގެ އައިސީޔޫ ރަސްމީގޮތެއްގައި ބޭނުންކުރަންފަށާ ބަލިމީހާއަށް ފަރުވާދޭން ފަށާފައިވަނީ އިއްޔެގެ ވަގުތެއްގައެވެ. އަދި އައިސީޔޫގައި ފަރުވާ ދެމުން އަންނަ ބަލިމީހާގެ ހާލުވެސް ކުރިއަށްވުރެ ރަނގަޅުކަމަށް ހއ. އަތޮޅު ހޮސްޕިޓަލް ހިންގެވުމާއި މިވަގުތު ހަވާލުވެހުންނެވި އުސްމާން އަޝްރަފް ވަނީ ވިދާޅުވެފަ އެވެ.
އަޝްރަފް އިދާޅުވީ އެ ހޮސްޕިޓަލްގައި މީގެ މަހެއްހާ ދުވަސްކުރިން އައިސީޔޫއެއް ޤާއިމްކުރި ނަމަވެސް، ހިދުމަތް ފޯރުކޮށްދިނުން ލަސްވީ އައިސީޔޫއަށް ބޭނުންވާ ފިޒިސިސްޓެއް ނެތުމުން ކަމަށެވެ. އެހެންނަމަވެސް ހެލްތް މިނިސްޓްރީގެ އެހީތެރިކަމާއެކު ހޮސްޕިޓަލަށް ފިޒިސިސްޓެއްގެ އިތުރުން އައިސީޔޫއަށް ބޭނުންވާ ގިނަ އިކުއިޕްމެންޓްތައް މިހާރު ލިބިފައިވާކަމަށް އަޝްރަފްގެ ވާހަކަފުޅުގައި ވަނީ ފާހަގަކުރައްވާފަ އެވެ.
ހއ. ހޮސްޕިޓަލްގައި ޤާއިމްކޮށްފައިވާ އައިސީޔޫއިން ލިބެން ހުރި ބައެއް ހިދުމަތްތަކުގެ ތެރޭގައި ވެންޓިލޭޓަރުގެ ހިދުމަތާއި، ޑެފިބްރިލޭޓަރގެ ހިދުމަތުގެ އިތުރުން ހުއްޓުމެއްނެތި އޮކްސިޖަން ލިބުމުގެ ހިދުމަތް ފާހަގަކޮށްލެވެއެވެ.
24 ގަޑިއިރު މެދުކެނޑުމެއްނެތި އާއްމުންނަށް ހިދުމަތް ދެމުންގެންދާ މި ހޮސްޕިޓަލްގައި ކުދި އަދި ބޮޑެތި ފެޅުންތަކަށް ހާއްސަ އޮޕަރޭޝަން ތިއޭޓަރެއްވެސް ހުރެއެވެ.
ހޮސްޕިޓަލުން ލިބެންހުރި ބައެއް ހިދުމަތްތަކާއި ގުޅޭގޮތުން ވާހަކަދައްކަވަމުން އަޝްރަފް ވިދާޅުވީ ހޮސްޕިޓަލްގައި މަސައްކަތްކުރާ ހޭނައްތާ ޑޮކްޓަރާއި އަދި ޑެންޓިސްޓް މިވަގުތު ހުންނެވީ ޗުއްޓީގައި ކަމަށެވެ. އަދި ކުރިއަށް އޮތީ ހިތާނީ މޫސުން ކަމުން، އެހާތަނަށް ހޭނައްތާ ޑޮކްޓަރެއް ލިބޭތޯ މަސައްކަތް ކުރަމުން އަންނަކަމަށް ވެސް އަޝްރަފްވަނީ ވިދާޅުވެފަ އެވެ.
ހއ. ހޮސްޕޓަލްގައި އައިސީޔޫއެއް ޤާއިމްކުރުމަކީ އެ ހޮސްޕިޓަލަށް ލިބުނު ވަރަށް ބޮޑު ކުރިއެރުމެއްކަމަށް ޑޮކްޓަރ.އެމްވީ އާއި ވާހަކަދެއްކި އެ ހޮސްޕިޓަލްގެ ނަރުހަކު ވަނީ ބުނެފަ އެވެ. އަދި މިއީ ހއ އަތޮޅުގެ ރައްޔިތުން އަބަދުވެސް ދެކެމުން އައި ހުވަފެނެއްކަމަށްވެސް އޭނާ ވަނީ ބުނެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)