ޓްރީޓޮޕް ހޮސްޕިޓަލާއި ދިއްގަރު ސިއްހީ މަރުކަޒު ގުޅިގެން ހަމުގެ ހެލްތު ކޭމްޕެއް ފައްޓައިފި އެވެ.

މިއަދު ހެނދުނު ފެށި މި ހެލްތު ކޭމްޕް ކުރިއަށް ގެންދިއުމަށް ހަމަޖެހިފައިވަނީ ހެނދުނު 08:00 އިން ފެށިގެން މިރޭ 21:00 އާއި ހަމަޔަށެވެ.

މި ހެލްތު ކޭމްޕްގައި ޓްރީޓޮޕް ހޮސްޕިޓަލްގެ ހަމުގެ ޑޮކްޓަރ ޑރ. ފަރުޒީން ނާސިރު އާއި ޑާމެޓޮލޮޖީ ސޮސައިޓީ އޮފް މޮލްޑިވްސްގެ ހަމުގެ ޑޮކްޓަރ ޑރ. ހަނާ ސޯލިހް މިހާރު ދަނީ ނަން ނޯޓުކޮށްފައިވާ ބަލިމީހުންނަށް ފަރުވާދެމުންނެވެ.

ދިއްގަރު ސިއްހީ މަރުކަޒާއި މިވަގުތު ހަވާލުވެ ހުންނެވި މުހައްމަދު ނަދީމް ވިދާޅުވިގޮތުގައި މި ކޭމްޕަށް ދިއްގަރުގެ ރައްޔިތުންގެ ފަރާތުން ދަނީ ވަރަށް ބޮޑު ތަރުހީބެއް ލިބެމުންނެވެ. އެގޮތުން އިއްޔެ މި ކޭމްޕަށް ނަން ނޯޓުކޮށް މެމޯ ހެއްދުމަށް ހުޅުވާލިއިރު ޖުމްލަ 120 މީހަކު ނަން ނޯޓުކޮށް މެމޯ ހައްދަވާފައިވާކަން ނަދީމް ވަނީ ފާހަގަކުރައްވާފައެވެ.

މިއަދު ކުރިއަށް މި ގެންދާ ހެލްތް ކޭމްޕްގައި ހަރަކާތްތެރިވަމުންދާ ޑޮކްޓަރުންނާއި ހަވާލާދީ ނަދީމް ވިދާޅުވީ އެންމެ ގިނަމީހުން ފަރުވާ ހޯދާފައިވަނީ ހަމުގެ އެކިއެކި އެލާޖީސްތަކާއި ގުޅޭގޮތުންކަމަށެވެ.

އާސަންދައިގެ ދަށުން ދިއްގަރުގައި ކުރިއަށް ގެންދާ މި ހެލްތް ކޭމްޕަކީ ހެލްތް މިނިސްޓްރީގެ ހުއްދަ ލިބިގެން ކުރިއަށް ގެންދާ ކޭމްޕެއްކަންވެސް ނަދީމްގެ ވާހަކައިގައި ވަނީ ފާހަގަ ކުރައްވާފައެވެ.

ސްކިން ހެލްތް ކޭމްޕްގެ އިތުރުން މިއަހަރުގެ ޑިސެމްބަރުމަހު ދިއްގަރު ހެލްތް ސެންޓަރުން އިސްނަގައިގެން ހިތާނީ ކޭމްޕެއްވެސް ކުރިއަށް ގެންދިއުމަށް ވަނީ ހަމަޖެހިފައެވެ.

ގުޅުންހުރި ލިޔުންތައް

ފަހުގެ ލިޔުންތައް