ނޮވެލް ކޮރޯނާ ވައިރަހަށް ތައްޔާރުވުމުގެ ގޮތުން މާލެއާއި އަތޮޅުތެރޭގައި ހޭލުންތެރިކުރުވުމުގެ ހަރަކާތްތަކެއް ކުރިއަށް ގެންގޮސްފި އެވެ.

ހެލްތް މިނިސްޓްރީގެ އިސްނެގުމުގެމަތިން މި ހަރަކާތްތައް ވަނީ ރާއްޖޭގެ ހުރިހާ ރަށެއްގައި ކުރިއަށް ގެންގޮސްފަ އެވެ. އެގޮތުން މި ހަރަކާތުގެ ތެރެއިން 130 ހެލްތް ފެސިލިޓީއަކުން ޖުމްލަ 6،461 މީހުންނަށް މި ބައްޔާއި ގުޅޭގޮތުން މައުލޫމާތު ދީފައިވާނޭ ކަމަށް ހެލްތް މިނިސްޓްރީން ވަނީ ބުނެފަ އެވެ.

ކޮރޯނާ ވައިރަހަށް ހޭލުންތެރިކުރުވުމުގެ މި ހަރަކާތް މާލޭ ސަރަހައްދުގައި ކުރިއަށް ގެންގޮސްފައިވަނީ ޖެނުއަރީ 30 އިން މިމަހުގެ 3 ވަނަ ދުވަހާއި ހަމައަށެވެ. މާލޭ ސަރަހައްދުގައި ކުރިއަށް ގެންދިޔަ ހަރަކާތުގައި ޕޯޓްތަކުގައި މަސައްކަތްކުރާ މީހުންނަށް މި ވައިރަހާއި އަދި ވައިރަހުން ރައްކާތެރި ކުރުމަށް ކުރެވިދާނެ ކަންކަމާއި ގުޅޭގޮތުން މައުލޫމާތ ދީފައިވާ ކަމަށް ހެލްތުން ވަނީ ބުނެފަ އެވެ. 

ހަމައެހެންމެ ރާއްޖޭގައި އުޅޭ ބިދޭސީންނަށް އަމާޒުކޮށް މޯލްޑިވްސް ރެޑްކްރެސެންޓްގެ އެހީތެރިކަމާއެކު ޖުމްލަ 5 ބަހަކުން މި ވައިރަހާއި ގުޅޭގޮތުން ހޭލުންތެރިކުރުވުމުގެ ހަރަކާތެއް ވެސް ވަނީ ހިންގާފައެވެ. އަދި މީޑިޔާގެ އެކިއެކި ވަސީލަތްތައް ބޭނުންކޮށްގެންވެސް މި ހަރަކާތްވަނީ ކުރިއަށް ގެންގޮސްފައެވެ.

ހެލްތް މިނިސްޓްރީއިން ބުނެފައިވާގޮތުގައި ކޮރޯނާވައިރަހަށް ތައްޔާރުވުމުގެ ގޮތުން އެއާޕޯޓުގައި ހަރަކާތްތެރިވާ މުއައްސަސާތަކަށް ފަރިތަކުރުވުމަށް ޓެބަލް ޓޮޕް އެކްސަސައިޒް އެއްވެސް ވަނީ ކުރިއަށް ގެންގޮސްފަ އެވެ.

މާލޭގެ އިތުރުން ރާއްޖެތެރޭގައި މި ވައިރަހަށް ތައްޔާރުވުމުގެ ގޮތުން ގޭގެއަށް ޒިޔާރަތްކޮށް މި ވައިރަހާއި ގުޅޭ މައުލޫމާތު ވަނީ ހިއްސާކޮށްފައެވެ. އަދި ސްކޫލުގެ ދަރިވަރުން ހިއްސާވާގޮތަށް ސަރުކާރު އަދި އެހެނިހެން މުއައްސަސާތަކުގެ ގެ މުވައްޒަފުންނަށް އަމާޒުކޮށް ވަނީ ސެޝަންތަކެއް ކުރިއަށް ގެންގޮސްފައެވެ.

އަދިހަމައެހެންމެ އަތޮޅު އަދި ރީޖަނަލް ހޮސްޕިޓަލްތަކުގެ ޕަބްލިކް ހެލްތް ވޯކަރުންނާއި، ޑޮކްޓަރުން، ނަރުހުން އަދި ލެބޯޓްރީ ޓެކްނީޝަނުން ހިމެނޭގޮތަށް ވަނީ ޓެލެކޮންފަރެންސެއް ކުރިއަށް ގެންގޮސްފައެވެ. މި ޓެލެކޮންފަރެންސްގައި ޖުމްލަ 306 ފަރާތެއް ބައިވެރިވެފައިވާ ކަމަށް ހެލްތް މިނިސްޓްރީއިން ބުނެއެވެ.

ގުޅުންހުރި ލިޔުންތައް

ފަހުގެ ލިޔުންތައް