"ތިބާގެ ޞިއްޙަތު ފުރިހަމައީ ކިހާ މިންވަރަކަށްތޯ؟" ނަމަކަށް ކިޔާ ޚާއްސަ ފޯރަމެއް މިރޭ އެމް.އެން.ޔޫ ގައި ކުރިއަށް ދާނެއެވެ. 

މި ފޯރަމް އަކީ އެމް.އެން.ޔޫ އިން ބާއްވަމުން ގެންދާ "އިލްމީ ފޯވަހި" ނަމަކަށް ކިޔާ ސިލްސިލާ ޕަބްލިކް ފޯރަމްގެ ބަޔެކެވެ. އެގޮތުން މިފަހަރުގެ ފޯރަމް އިންތިޒާމްކޮށްފައިވަނީ އެމް.އެން.ޔޫގެ ސްކޫލް އޮފް މެޑިސިން އިންނެވެ. ފޯރަމް ކުރިއަށް ގެންދިއުމަށް ހަމަޖެހިފައިވަނީ މިރޭ 8:00-9:30 އަށް އެމް.އެން.ޔޫ ގެ ފެކަލްޓީ އޮފް އެޑިއުކޭޝަން އޮޑިޓޮރިއަމް ގައެވެ.

އާއްމުންނަށް ހުޅުވާލައިގެން ބާއްވާ މި ފޯރަމްގައި މައުލޫމާތު ދިނުމަށް ސިއްހީ ތަޖުރިބާކާރުންގެ ޕެނަލްއެއްވެސް ވަނީ އެކުލަވާލެވިފައެވެ. މިޕެނަލްގައި ހިމެނިވަޑައިގަންނަވަނީ ޑރ. ޝީޒާ އަލީ، ޑރ. ޝައިސްތާ ޒުބައިރު، ޑރ. އައިމިނަތު ހުދާ، އަދި ޑރ. އިބްރާހީމް އިޔާޒް އެވެ.

ޑޮކްޓަރ.އެމްވީ އަށް މައުލޫމާތު ދެއްވަމުން ސްކޫލް އޮފް މެޑިސިންގެ ޑީން ޑރ. ޝީޒާ އަލީ ވިދާޅުވީ މި ފޯރަމްގެ އަމާޒަކީ "ތިބާގެ ޞިއްޙަތު ފުރިހަމައީ ކިހާ މިންވަރަކަށްތޯ؟" މިސުވާލަށް ޖަވާބު ދިނުމެވެ. އެގޮތުން 8:00 ޖަހާއިރުން ފެށުގެން އާއްމުންނަށް ހިލޭ ބޭސިކް ސްކްރީނިންގް ޓެސްޓުތަކެއް ހެދޭނެއެވެ. އަދި މިޓެސްޓުތަކުގެ ނަތީޖާއަށް އަލިއަޅުވާލާ ވިސްނަންޖެހޭ ކަންކަމާ މެދު 8:30 އިން ފެށިގެން ޕެނަލް އިން މަޝްވަރާ ކުރާނެ ކަންވެސް ޑރ. ޝީޒާ ވިދާޅުވިއެވެ.

މިރޭގެ ފޯރަމްގައި އާއްމުންނަށް ހެދޭ ޓެސްޓުތަކުގެ ތެރޭގައި ހަކުރު ހުރި މިންވަރާއި، ލޭގެ ޕްރެޝާ، ހިތުގެ ބަލިތަކަށް ޓެސްޓު ކުރުމުގެ އިތުރުން ހަށިގަނޑުގެ ބޮޑީ މާސް އިންޑެކްސް (ބީ.އެމް.އައި) ވެސް ބެލޭނެއެވެ. 

ފަހުގެ ލިޔުންތައް