އުމުރުން ދުވަސްވީ މީހުންގެ ހައްގުތައް ހިމާޔަތް ކުރުމުގެގޮތުން، ސަރުކާރުން އުމުރުން ދުވަސްވީ މީހުންނާއި ގުޅޭ އެކްޝަން ޕްލޭންއެއް އިފްތިތާހް ކޮށްފި އެވެ. މި އެކްޝަން ޕްލޭން އިފްތިތާހް ކޮށްދެއްވާފައިވަނީ ރައީސް އިބްރާހިމް މުހައްމަދު ސޯލިހްގެ އަނބިކަބަލުން ފަޒްނާ އަހުމަދު އެވެ.
މި އެކްޝަން ޕްލޭން ތައާރަފްކޮށް ވާހަކަފުޅުދައްކަވަމުން ޖެންޑާ މިނިސްޓަރ ސިދާތާ ޝަރީފް ވިދާޅުވީ އުމުރުން ދުވަސްވީ މީހުންނަށް ހާއްސަކޮށް ރެސިޑެންސީ ހޯމްއެއް އެޅުމުގެ އަމަލީ މަސައްކަތް ސަރުކާރުން ވަރަށް އަވަހަށް ފައްޓާނޭ ކަމަށެވެ.
އަދި މިނިސްޓަރ ވަނީ ކޮންމެ އަހަރެއްގެ ވެސް ސެޕްޓެމްބަރ އެއްވަނަ ދުވަހަކީ އުމުރުންދުވަސް ވީ މީހުންގެ ދުވަސް ކަމުގައި ކަނޑައަޅާ އިއުލާން ކުރައްވާފަ އެވެ. މީގެއިތުރުން މިނިސްޓަރ ވިދާޅުވީ މި މުޖުތަމައުން އުމުރުން ދުވަސް ވީ މީހުންނަށް އަޅާލުމާއި، ރައްކާތެރިކަމާއި އަދި ސިއްހަތާއި ދުޅަހެޔޮކަން ކަށަވަރުކޮށްދޭން ޖެހޭނެ ކަމަށެވެ.
މިއަދު މި އިފްތިތާހްކުރި އެކްޝަން ޕްލޭންގައި ޖުމްލަ 34 ކަމަކުން އުމުރުން ދުވަސްވީ މީހުންނަށް ޙާއްސަ ސަމާލުކަމެއް ދީފައި ވެއެވެ. އޭގެ ތެރޭގައި އުމުރުން ދުވަސްވީ މީހުންނަށް އަޅާލުމާއި، ރައްކާތެރިކަން ފޮރުކޮށްދިނުން ފަދަ ކަންކަން ހިމެނެއެވެ.
ކޮންމެ އަހަރެއްގެ ވެސް ސެޕްޓެމްބަރު މަހުގެ އެއްވަނަ ދުވަސް އުމުރުން ދުވަސްވީ މީހުންގެ ދުވަހުގެ ގޮތުގައި ފާހަގަކުރުމަށް ނިންމާފައިވާއިރު، މިދުވަހަކީ ގައުމަށާއި އެ މީހުންގެ އާއިލާތަކަށް ކޮށްދީފައިވާ ހިދުމަތް ފާހަގަކޮށް އަގުވަޒަން ކުރުމަށްޓަކައި ފާހަގަކުރަން ނިންމި ދުވަހެއް ކަމަށް މިނިސްޓަރ ވަނީ ވިދާޅުވެފަ އެވެ.
މީގެއިތުރުން މި ދުވަސް ފާހަގަކުރަން ހިންގާ ހަރަކާތްތަކުގައި ތެރޭގައި އެ މީހުންގެ ތަޖުރިބާ އާއި މައުލޫމާތު ހިއްސާކުރުން ހިމެނޭނެ ކަމަށް ޝިދާތާ ވިދާޅުވި އެވެ. އަދި މި ދުވަހާ ގުޅޭ ޕްރޮގްރާމްތައް ސްކޫލްތަކަށް ތައާރަފްކުރަން ނިންމާފައިވާ ކަމަށް ވެސް އޭނާ ވިދާޅުވި އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)