ފ. އަތޮޅު ނިލަންދޫގައި ހުންނަ އެ އަތޮޅު ހޮސްޕިޓަލުން މިމަހުގެ 14 އިން 17 ކުރިއަށް ގެންދިއުމަށް ހަމަޖެހިފައިވާ މެޑިކަލް ކޭމްޕް ފަށައިފި އެވެ.
މި ކޭމްޕާއި ގުޅޭގޮތުން މައުލޫމާތު ދެއްވަމުން ފ. އަތޮޅު ހޮސްޕިޓަލްގެ އެސިސްޓެންތް ކޮމިއުނިޓީ ހެލްތް އޮފިސަރ ވިދާޅުވީ، ކޭމްޕް ކުރިއަށް ދަނީ ފ. އަތޮޅު ހޮސްޕިޓަލްގައި ކަމަށާއި، ކޭމްޕްގައި މިހާތަނަށް ޖުމްލަ 300 އަށްވުރެ ގިނަ މީހުން ނަންނޯޓު ކޮށްފައިވާ ކަމަށެވެ.
މީގެއިތުރުން މި ކޭމްޕްގައި ހިމެނޭ 5 ޑޮކްޓަރުންގެ ޓީމްގައި ކަށީގެ ޙާއްސަ ޑޮކްޓަރަކާއި، ކަރުންމަތީގެ ޙާއްސަ ޑޮކްޓަރަކާއި، ލޮލުގެ ޙާއްސަ ޑޮކްޓަރަކާއި، ހަމުގެ ޙާއްސަ ޑޮކްޓަރެއްގެ އިތުރުން އެތެރެހަށީގެ ޙާއްސަ ޑޮކްޓަރެއްވެސް ބައްލަވަމުން ގެންދަވާނެކަމަށް ޝުއައިބު ވަނީ ވިދާޅުވެފަ އެވެ. އަދި ކޭމްޕްގައި ހަރަކާތްތެރިވާ ޑޮކްޓަރުންނަނީ ކުޅުދުއްފުށީ ރީޖަނަލް ހޮސްޕިޓަލުންނާއި، އައްޑޫ ރީޖަނަލް ހޮސްޕިޓަލްގެ އިތުރުން އައިޖީއެމްއެޗްގެ ޑޮކްޓަރުން ކަމަށް ޝުއައިބު ވަނީ ވިދާޅުވެފަ އެވެ.
ޝުއައިބު ވަނީ މި ކޭމްޕަށް އާއްމުންގެ ފަރާތުން ލިބެމުންދާ ތަރުހީބު ވެސް ފާހަގަކުރައްވާފަ އެވެ. އަދި ހެލްތް މިނިސްޓްރީންނާއި ފ. އަތޮޅު ކައުންސިލުން މި ކޭމްޕަށް ދެއްވާފައިވާ އެއްބާރުލުންވެސް ޝުއައިބު ވަނީ ފާހަގަކުރައްވާފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)