ނޯރޯވައިރަސް ޖަރާސީމުން ތަޣައްޔަރުވެފައިވާ ގަނޑުކުރި ރާސްބެރީ ދިވެހިރާއްޖެއަށް އެތެރެވެފައިވާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީއިން އިއުލާން ކޮށްފިއެވެ.

މިއޮތޯރިޓީއިން މިއަދު ނެރުނު ނޫސްބަޔާނުގައި ބުނެފައިވާ ގޮތުން ހިމްބީގަންޒް (Himbeeren) މަރުކާގެ ގަނޑުކުރި ރާސްބެރީގައި ޖަރާސީމް ހުރިކަމާއި ރާއްޖެއަށް އެތެރެވެފައިވާކަން ޔޫރަޕުގެ ރެޕިޑް އެލާޓް ސިސްޓަމް ފޮރ ފުޑް އެންޑް ފީޑް (RASFF) އިން ވަނީ އަންގާފައެވެ. 

މިއެލާރޓް އާއި ގުޅުގެން އެފް.ޑީ.އޭއިން މިފަދަ އުފެއްދުންތައް ހޯދާ އަނބުރާ ބާޒާރުން ނެގުމުގެ މަސައްކަތް ދަނީ ކުރަމުންނެވެ. އަދި މިއޮތޯރިޓީއިން މައުލޫމާތުދިން ގޮތުގައި މިއުފެއްދުން ޑިސްޓްރިބިޔުޓު ވެފައިވަނީ ހަމަ އެކަނި ރިސޯޓު ތަކަށް ކަމަށް ހޯދުންތަކުން ދައްކައެވެ.

ނޯރޯވައިރަސްގެ ހަށިގަނޑަށް އެތެރެވުމުން ދިމާވާ ކަންތައްތަކުގެ ތެރޭގައި ހޮޑުލެވުން، ބަނޑުގައި ރިއްސާ ގިނައިން ބޮޑުކަމު ދެވުން، ހުންއައުން، ކާހިއްނުވުން އަދި ބޮލުގައި ރިއްސުން ހިމެނެއެވެ.

އެފް.ޑީ.އޭއިން މިތަޣައްޔަރުވެފައިވާ ގަނޑުކުރި ރާސްބެރީ އެތެރެނުކުރުމަށާއި، ނުވިއްކުމަށާއި ބޭނުންނުކުރުމަށް އެންގިއެވެ. އަދި ގަނޑުކުރި ރާސްބެރީ އެތެރެކުރާ، ވިއްކާ އަދި ބޭނުންކުރާ ފަރާތްތައް ފުރިހަމަ މައުލޫމާތު ނެތް ރައްކާތެރިކަން ކަށަވަރުނުވާ ރާސްބެރީ އެތެރެނުކުރުމަށް، ނުވިއްކުމަށް އަދި ނުކެއުމަށްވެސް މިއޮތޯރިޓީއިން އެންގިއެވެ. 

އިތުރު މަޢުލޫމާތު ހޯދުމަށް އެފް.ޑީ.އޭގެ ރަސްމީ ގަޑީގައި 3014361 އަދި ނުރަސްމީގަޑީގައި 7603204 ނަންބަރަށް ގުޅޭނެއެވެ.

ފަހުގެ ލިޔުންތައް