ރާއްޖޭގެ ބަލީގެ ދަފްތަރުތަކުން ކަށަވަރުވާގޮތުގައި މިހާރު ރާއްޖެގައި އެންމެ ގިނަ ބަލިތަކަކީ، އެ ބަލީގެ ޝިކާރައަކަށްވެ ދުނިޔެ ދޫކޮށްދާ ބަލިތަކަށް ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެ އެވެ. 

ޕެރެޑައިސް އައިލެންޑް ރިސޯޓުގައި މިހާރު ކުރިއަށްދާ އާއްމު ސިއްހަތާއި ގުޅޭ މަހާސިންތާގައި ވާހަކަފުޅު ދައްކަވަމުން މިނިސްޓަރ އަމީން ވިދާޅުވީ ހިތުގެ ބައްޔާއި، ކެންސަރާއި، ހަކުރުބަލި ފަދަ ގައިންގަޔަށް ނާރާ ބަލިތަކުގެ ފަރުވާ ކަށަވަރުކުރުމަށް ބޭނުންވާ ފަންނުވެރިކަމާއި، ޒަމާނީ ވަސީލަތްތައް ހޯދުމަށް ސަރުކާރުގެ ޖީބަށް ނުކަތާވަރަށް ހޭދަކުރަމުން ދާ ކަމަށެވެ. 

މިނިސްޓަރ ވިދާޅުވީ މިފަދަ ބަލިތައް ޖެހުމަށް މެދުވެރިވާ މައިގަނޑު ސަބަބަކީ ދިރިއުޅުމުގެ އާދަތައް ކަމަށެވެ. އެގޮތުން ހެލިފެލިވެ އުޅުމާއި، ކެއުން ބުއިމުގެ އާދަތަކާއި، މަސްތުވާތަކެއްޗާއި، ދުންފަތުގެ އިސްތިއުމާލުކުރުން ފަދަ ކަންކަމަށް ހޭލުންތެރިނުވެވުމަކީ މިފަދަ ބަލިތަކަށް ހުށަހެޅިގެންދާ ސަބަބެއް ކަމަށް މިނިސްޓަރ ވަނީ ފާހަގަކުރައްވާފަ އެވެ. 

ތިން ދުވަހުގެ މުއްދަތަކަށް ކުރިއަށްދާ މި މަހާސިންތާގެ އެހީގައި އެކުލަވާލާ މަގުޗާޓު ވެގެންދާނީ ކުރިއަށް އޮތް ޒަމާންތަކުގައި ދިވެހިންނަށް ދުޅަހެޔޮ ސިއްހަތެއް ކަށަވަރުކޮށްދޭނޭ މަގުޗާޓެއް ކަމަށްވެސް މިނިސްޓަރުގެ ވާހަކަފުޅުގައި ވަނީ ފާހަގަކުރައްވާފަ އެވެ. ހަމައެހެންމެ އާއްމު ސިއްހަތާއިމެދު ދިވެހިންނަށް އެނގި އަދި ނޭނގި ނަމަވެސް އިޙްމާލްވެވިފައި ވާކަމަށްވެސް މިނިސްޓަރުގެ ވާހަކަފުޅުގައި ވަނީ ފާހަގަ ކުރައްވާފައެވެ.

އިއްޔެ ޕެރެޑައިސް އައިލެންޑްގައި ފެށި މި މަހާސިންތާއަކީ މިއީ ޢާންމު ޞިއްޙަތު ކުރިއެރުވުމުގައި ކުރިމަތިވެފައިވާ މައިގަނޑު މައްސަލަތައް ކަމަށްވާ، ރާއްޖޭގެ އާބާދީ އެކި ޢުމުރުފުރާތަކަށް އަންނަ ބަދަލުތަކާއިއެކު އާބާދީގެ ޞިއްޙީ މައްސަލަތަކާއި، ރާއްޖޭގެ ރައްޔިތުން ދިރިއުޅޭ މާޙައުލާއި، ރައްޔިތުންގެ ދިރިއުޅުމުގެ ވައްޓަފާޅިއާއި ކެއިންބުއިމުގެ އާދަތަކަށް އައި ބަދަލުތަކާއި، ރާއްޖޭގައި ގައިންގަޔަށް ނާރާ ބަލިތައް އިތުރުވުމާއި މީހުންގެ ދިރިއުޅުމުގެ މާޙައުލާ ގުޅުންހުރި ކަންކަމުގެ ސަބަބުންނާއި ރާއްޖޭގައި ދިރިއުޅޭ ބޭރުމީހުންގެ އާބާދީ އިތުރުވަމުން ދިއުމުގެ ސަބަބުން ގައިންގަޔަށް އަރާ ބަލިތައް ކޮންޓްރޯލް ކުރުމުގައިދިމާވެފައިވާ ގޮންޖެހުންތައް ދެނެގަނެ އެކަންކަމާމެދު މަޝްވަރާކޮށް، އެކަންކަން ހައްލުކުރުމަށް ހުރިހާ ދާއިރާތަކެއް ހިމެނިގެން މަސައްކަތް ރާވާލެވޭނެ އިންތިޒާމްތަކާބެހޭ ގޮތުން ބޭއްވޭ މަހާސިންތާއެކެވެ.   

ފަހުގެ ލިޔުންތައް