ރާއްޖޭގެ ސިއްހީ ދާއިރާ އިތުރަށް ތަރައްގީ ކުރުމަށް ސަރުކާރުން ދަނީ ބޮޑެތި ހަރަދުތަކެއް ކުރަމުން – ނައިބު ރައީސް
ދިވެހިރާއްޖޭގެ ސިއްހީ ދާއިރާ އިތުރަށް ތަރައްޤީކުރުމަށް ސަރުކާރުން ދަނީ ބޮޑެތި ހަރަދުތަކެއް ކުރަމުންކަމަށް ރާއްޖޭގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
"ނޭޝަނަލް ކޮންފަރެންސް އޮން ރީވިޓަލައިޒިން ޕަބްލިކް ހެލްތު: ވާކިން ޓު ގެދާ ފޯ އަ ހެލްތިއާ ނޭޝަން" ގެ ނަމުގައި ތިން ދުވަހުގެ މުއްދަތަށް ބާއްވާ މަހާސިންތާ ވާހަކަފުޅުދައްކަވަމުން ނައިބު ރައީސް ވިދާޅުވީ ރާއްޖޭގެ ސިއްހީ ދާއިރާ ތަރައްގީކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ސަރުކާރުގެ ސްޓްރެޓިޖިކް އެކްޝަން ޕްލޭންގައި ރާއްޖޭގެ ސިއްހީ ނިޒާމުގެ މައުލޫމާތު ވަރަށް ސާފުކޮށް އޮތްކަމަށް ނައިބު ރައީސް ވަނީ ވިދާޅުވެފަ އެވެ.
މިއަދު ފެށި މަހާސިންތާގައި މަޝްވަރާކުރާ ބައެއް ކަންކަމުގެ ތެރޭގައި އާބާދީގެ އެކި އުމުރުފުރާތަކަށް އަންނަ ބަދަލުތަކާއި، އާބާދީގެ ސިއްހީ މައްސަލަތަކާއި ދިރިއުޅޭ މާހައުލާއި ދިރިއުޅުމުގެ ވައްޓަފާޅި އާއި ކެއުންބުއިމުގެ އާދަތަކަށް އައި ބަދަލުތަކާއި ގައިންގަޔަށް ނާރާ ބަލިތައް އިތުރުވުން ހިމެނެ އެވެ.
މި މަހާސިންތާގައި، ސަރުކާރުގެ ކުރިއަށް އޮތް ފަސް އަހަރު ދުވަހުގެ ސްޓްރެޓިޖިކް އެކްޝަން ޕްލޭން 2019- 2023 (ސެޕް) ގައިވާ ސިއްހީ ދާއިރާގެ މައިގަޑު ލަނޑުދަނޑިތައް ހާސިލް ކުރުމަށް ބޭނުންވާ މަގުޗާޓެއް އެކުލަވާލައިލާނެ އެވެ. އަދި ސިއްހީ ދާއިރާގެ ނަތީޖާތައް ހާސިލް ކުރުމަށް ތަފާތު ދާއިރާތައް ގުޅިގެން އެކުގައި މަސައްކަތް ކުރުމުގެ ފުރުސަތު ތަނަވަސްކުރުމަށްޓަކައި ޕަބްލިކް ހެލްތް ޗާރޓާއެއްގައި ވެސް ސޮއިކުރާނެ އެވެ.
ޕެރެޑައިސް އައިލެންޑް ރިސޯޓުގައި ފެށި މި މަހާސިންތާގައި ވާހަކަފުޅު ދައްކަވަމުން ނައިބުރައީސް އިތުރަށް ވިދާޅުވީ ރާއްޖޭގެ އާއްމު ސިއްހަތު ރަނގަޅު ކުރަން ކުރަން ޖެހޭ މަސައްކަތްތައް އެހެން ގައުމުތަކަށް ވުރެ ފުރިހަމަ އަށް ކުރެވޭނެ ކަމަށެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)