އާއްމުންގެ މެދުގައި ދުޅަހެޔޮ ސިއްހަތަށް އޮންނަ ހޭލުންތެރިކަން އިތުރުކުރުމުގެ ގޮތުން ތ. ވިލުފުށީ ސިއްހީ މަރުކަޒާއި ތ.  ވިލުފުށީ ކައުންސިލް ގުޅިގެން މެޑިކަލް ކޭމްޕެއް ފަށައިފިއެވެ.

ތިން ދުވަހުގެ ނިޔަލަށް ކުރިއަށްގެންދާ މި މެޑިކަލް ކޭމްޕް ފަށާފައިވަނީ އިއްޔެ އެވެ.

މި މެޑިކަލް ކޭމްޕާއި ގުޅޭގޮތުން މައުލޫމާތު ދެއްވަމުން ތ. ވިލުފުށީ ސިއްހީ މަރުކަޒު ހިންގެވުމާއި މިހާރު ހަވާލުވެ ހުންނެވި ސިއުތު ވިދާޅުވީ އިއްޔެފެށި މި މެޑިކަލް ކޭމްޕްގައި ގިނަ ޑޮކްޓަރުންތަކަކާއި ނަރުހުން ހަރަކާތްތެރިވަމުން އަންނަ ކަމަށެވެ. އެގޮތުން އަންހެނުންގެ ހާއްސަ ޑޮކްޓަރަކާއި، ހިތުގެ ހާއްސަ ޑޮކްޓަރެއްގެ އިތުރުން ކުޑަކުދިންގެ ހާއްސަ ޑޮކްޓަރެއް ވެސް ކޭމްޕްގައި ހަރަކާތްތެރިވަމުން އަންނަކަމަށް ސިއުތު ވަނީ ވިދާޅުވެފަ އެވެ.  އަދި ހަމައެހެންމެ ސްކޭންކުރުމަށް ހާއްސަ ޑޮކްޓަރެއްވެސް ހަރަކާތެރިވަމުން އަންނަކަމަށް ސިއުތުވަނީ ވިދާޅުވެފަ އެވެ.

ސިއުތު އިތުރަށް ވިދާޅުވީ މެޑިކަލް ކޭމްޕަށް އާއްމުންގެ ފަރާތުން ބޮޑު ތަރުހީބެއް ލިބެމުން އަންނަ ކަމަށެވެ. އެގޮތުން ރަޖިސްޓްރޭޝަންއަށް ހުޅުވާލި ވަގުތުގެ ތެރޭގައި 500 މީހުން ރަޖިސްޓްރީވެފައިވާކަންވެސް ސިއުތު ވަނީ ފާހަގަކުރައްވާފައެވެ. އަދި ރަޖިސްޓްރީވެފައިވާ މީހުންގެ ތެރޭގައި ގިނައީ އަންހެނުންކަންވެސް ސިއުތުގެ ވާހަކައިގައި ވަނީ ފާހަގަކުރައްވާފައެވެ.

ވިލުފުށީ ސިއްހީ މަރުކަޒުގައި ކުރިއަށް ގެންދާ މި މެޑިކަލް ކޭމްޕްގައި އުރަމަތީގެ ކެންސަރާއި އަދި ރަހިމުގެ ކެންސަރަށް ސްކްރީންވެސް ކުރެވޭނެ އެވެ. މީގެ އިތުރުން ހިތުގެ ބަލިތަކާއި އަދި ކުޑަކުދިންނަށް ސިއްހީގޮތުން ކުރިމަތިވާ އެކިއެކި މައްސަލަތަކަށް ވެސް ފަރުވާދޭނެ އެވެ.

ސިއުތު ވިދާޅުވީ މިހާ ކާމިޔާބު ކަމާއެކު ވިލުށީގައި މެޑިކަލް ކޭމްޕް ކުރިއަށް ގެންދެވުނީ ގިނަ ބައެއްގެ އެހީތެރިކަމާއެކުގައި ކަމަށެވެ. އެގޮތުން ހުޅުމާލޭ ހޮސްޕިޓަލުން އިސްނަގައިގެން ތިން ޑޮކްޓަރުންނާއި ތިން ނަރުހުން މި ކޭމްޕްގައި ހަރަކާތްތެރިވަމުން އަންނަ ކަމަށެވެ. އަދި މީގެ އިތުރުން މި ކޭމްޕް ކުރިއަށް ގެންދިއުމުގައި ސޮސައިޓީ ފޯ ހެލްތް އެޑިއުކޭޝަން (ޝީ)ގެ ފަރާތުން ލިބުނު އެހީތެރިކަން ވެސް ސިއުތު ވަނީ ފާހަގަކުރައްވާފަ އެވެ.

އަދި ހަމައެހެންމެ މި މެޑިކަލް ކޭމްޕް ކުރިއަށް ގެންދިއުމަށް ވިލިފުށީ ރައްޔިތުންގެ ފަރާތުން ލިބުނު އެއްބާރުލުންވެސް ސިއުތުވަނީ ފާހަގަކުރައްވާފަ އެވެ. 

ފަހުގެ ލިޔުންތައް