
2019 ވަނަ އަހަރުގެ ނޮބަލް ޕްރައިޒްގެ ސިއްހީ ދާއިރާއިން (މެޑިސިން އަދި ފިޒިއޮލޮޖީގެ ދާއިރާ) އިނާމު ހާސިލުކޮއްފައިވަނީ ތިން ސައިންސްވެރިންގެ ހޯދުމަކަށެވެ. އެއީ ހަށިގަނޑުގެ ސެލްތަށް އޮކްސިޖަން ހުންނަ ވަރު އިހުސާސް ކުރާ ގޮތާއި އެއަށް އަމަލު ކުރާނެ ގޮތެވެ. މި ސައިންސްވެރިންނަކީ އެމެރިކާގެ ވިލިއަމް ޖީ. ކޭލިން ޖޫނިޔާ، ބްރިޓަންގެ ޕީޓަރ ޖޭ. ރެޑްކްލިފް އަދި އެމެރިކާގެ ގްރެގް އެލް. ސެމެންޒާ އެވެ.
މި އިނާމު މިދިޔަ ހޯމަ ދުވަހު އިއުލާން ކުރެއްވި ނޮބަލް ކޮމިޓީ ވިދާޅުވީ، އެފަންނުވެރިންގެ ހޯދުމުގެ ސަބަބުން ފުރާނަ ދެމެހެއްޓުމަށް މެދުވެރިވާ ބައިތަކުގެ މައުލޫމާތު އިތުރަށް ފުޅާވެގެންދިޔަކަމެވެ. މީގެއިތުރުން މި ދިރާސާގެ ސަބަބުން ކެންސަރ، ހިތުގެ ބަލި (ހާރޓް އެޓޭކް) އަދި ސްޓޮރޯކް ފަދަ ބަލިތަކަށް ބޭސްކުރުމަށް ފަސޭހަވުމުގެ މަގު ދައްކައިދެއެވެ.
އޮކްސިޖަންއަކީ ފުރާނައަށް އެންމެ ބޭނުންތެރި އެއް ގޭހެވެ. ނަމަވެސް މި އައު ހޯދުންތަކުން އޮކްސިޖަން ގޭސް ހަށިގަނޑަށް ލިބެން ހުރި ވަރަކުން ހަށިގަނޑުގެ ސެލްތަކަށް ގެންނަ ބަދަލުތައް ހޯދުނެވެ. މިގޮތުން އޮކްސިޖަން ލެވަލް މަދުވުމުން، އެރީތުރޯޕޮއިޓީން (އީ. ޕީ. އޯ) ހޯމޯންގެ ލެވަލް މަތިވެ، ލޭގެ ރަތް ސެލް އަދި ލޭ ދައުރު ކުރާ ނާރު އިތުރުކުރެވެއެވެ. ލޭ ދައުރު ކުރާ ނާރު އިތުރު ކުރުމަށް ކިޔަނީ އެންޖިއޯޖެނަސިސް އެވެ.
އިނާމު ލިބުނު އެއް ފަރާތް ކަމަށް ވާ ސެމެންޒާ ދިރާސާކުރީ އެރީތުރޯޕޮއިޓީން (އީ. ޕީ. އޯ.) ގެ ޖީންއެވެ. މި ޖީން މަސައްކަތް ކުރަން ބޭނުންވަނީ ހަމައެކަނި ޕްރޮޓީން ކޮމްޕްލެކްސްއެއް ކަމަށްވާ "ހައިޕޮކްސިއާ އިނޑިއުސިބަލް ފެކްޓޯ" (އެޗޮ. އައި. އެފް.) ކަމަށް ސެމެންޒާ ވިދާޅުވިއެވެ. މިގޮތުން މި ޕްރޮޓީން ކޮމްޕްލެކްސް، ހަށިގަނޑުގައި އުފެދެނީ އޮކްސިޖަން ލެވަލް މަދުވީމައާއި އަދި އޮކްސީޖަން ލެވަލް ގިނަވުމުން އެ ޕްރޮޓީން ގެއްލެ އެވެ. މީގެ އިތުރުން، އިނާމު ލިބުނު ރެޑްކްލިފް އަދި ކޭލިން ދިރާސާ ކުރުމުގައި ހޯދީ، އޮކްސިޖަން ގިނަ ވުމުން އެހެން ޕްރިޓީންއެއް ކަމަށްވާ، ވީ. އެޗް. އެލް. އެ ޕްރޮޓީން ކޮމްޕްލެކްސް ނައްތައިލާ ކަމެވެ.
މި ތިން ބޭފުޅުންގެ ހޯދުންތައް އެކުގައި ދައްކައިދެނީ އެކި އޮކްސިޖަން ލެވަލްއަށް މަސައްކަތް ކުރާނޭ މޮލިކިއުލާ ސްވިޗެއް ހަށިގަނޑުގައި ވާކަމެވެ. މީގެ ސަބަބުން، ލޭގެ ސެލް އަދި ނާރު އިތުރަށް އުފެދޭ ފަދަ ބަލިތައް، މިސާލަކަށް ކެންސަރ، ބޮޑަށް އޮޅުން ފިލުވައިދެއެވެ. އަދި މިހޯދުމުގެ ސަބަބުން ގިނަ ބޭސްތަކެއް އުފައްދާފައި ވެއެވެ. މީގެ ތެރޭގައި، "ރޮކްސަޑަސްޓަޓް" އަދި "ޑެޕްރޮޑަސްޓަޓް" ހިމެނެއެވެ. މި ބޭސްތަކުން ލޭގެ ރަތް ސެލް ގިނަ ކޮއްދިނުމުން އެނީމިއާ ބަލި ޖެހިފައިވާ މީހުންނަށް ފަރުވާ ކުރެވެއެވެ. މީގެ އިތުރުން މިކަހަލަ ބޭސްތަކުން ހިތުގެ ބަލި އަދި ފުއްޕާ މޭގެ ކެންސަރަށް ފަރުވާކުރެވެއެވެ.
މިގޮތުން، ސިކުނޑި، ގުރުދާ، ފުއްޕާ މޭ އަދި ގޮހޮރުގެ ކޭންސަރގެ ފަރުވާއަށް "އެވަސްޓިން" ފަދަ އެންޖިއޯޖެނަސިސް ހުއްޓުވާ ބޭސް ބޭނުންކުރެއެވެ. ކެންސަރ ސެލްތަކަށް ބޭނުންވާނޭ އޮކްސިޖަން ދައުރުވާ އައު ލޭ ނާރު އުފެއްދުން މިބޭހުން ހުއްޓުވައިދެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)