ޒެންޓެކް ބޭހުގައި ކެންސަރަށް މަގުފަހިކޮށްދޭ މާއްދާއެއް އެކުލެވިގެންވޭ – އެފް.ޑީ.އޭ
އެމެރިކާގެ ފުޑް އެންޑް ޑްރަގް އެޑްމިނިސްޓޭޝަން (އެފް.ޑީ.އޭ) އިން ހުކުރު ދުވަހު ނެރުނު ބަޔާނެއްގައި ރެނިޓިޑިން ބޭހުގައި ކެންސަރަށް މަގުފަހިކޮށްދޭ (ކާސިނޯޖެން) މާއްދާއެއް އެކުލެވެގެންވާ ކަމަށް ހާމަކުރިއެވެ.
ރެނިޓިޑިން ބޭސް ވިއްކަނީ ޒެންޓެކް އަދި އެހެނިހެން ނަންނަމުގެ ދަށުންނެވެ. މިބޭހަކީ ހިސްޓަމިން-2 ބްލޮކަރ އެކެވެ. މީގެ މާނައަކީ ބަނޑުން އުފައްދާ އެސިޑް މަދުކުރުމަށް މިބޭސް އެހީތެރިވެދޭ ކަމެވެ. ޒެންޓެކްއަކީ އާންމުކޮށް މެއިން ދިލަނެގުމުން ނަގާ އޯވާ-ދަ-ކައުންޓަރ (ޑޮކްޓަރުގެ ބޭސް ސިޓީއަކާއި ނުލާ ގަނެވޭ) ބޭހެކެވެ. އަދި ޑޮކްޓަރެއްގެ ބެލުމުގެ ދަށުން މިބޭހުގެ މަތީ ޑޯޒްތައް ގޮހޮރުގެ އަލްސަރއަށް ފަރުވާ ކުރުމަށާއި ގެސްޓްރޯފޭޖިއަލް ރިފްލަކްސް ބައްޔަށްވެސް ބޭނުންކުރެވެއެވެ.
އެފް.ޑީ.އޭ އިން ބަޔާން ކުރި ގޮތުގައި ރެނިޓިޑިންގައި އެކުލެވިގެންވަނީ އެން.ޑީ.އެމް.އޭ ނަމަކަށް ކިޔާ މާއްދާއެކެވެ. އެހެނަސް އެއީ ވަރަށް މަދު މިންވަރަކަށެވެ. މިމާއްދާއަކީ އިންސާނުންނަށް ކެންސަރު ޖެހެން މެދުވެރިކޮށްދޭ މާއްދާއެކެވެ. މިމާއްދާ ފެނާއި، މަސް، ޑެއިރީ އަދި ތަރުކާރީގައި ވެސް ހިމެނެއެވެ.
މީގެއިތުރުން އެފް.ޑީ.އޭ އިން އަންގަނީ މީހުން މިބޭސް ހުއްޓާލަން ކޮންމެހެން ނުޖެހޭ ކަމެވެ. އެއީ އެން.ޑީ.އެމް.އޭ އެކުލެވިގެންވަނީ މަދު މިންވަރަކަށް ކަމުގައި ވާތީއެވެ. މިބޭސް ހުއްޓާލަން ބޭނުންވާ ފަރާތްތަކުން ހުއްޓާލަންވާނީ ޑޮކްޓަރުންގެ ލަފާގެ މަތިންނެވެ. އެހެންނަމަވެސް މިބޭހުގެ އޯވާ-ދަ-ކައުންޓަރ ވައްތަރު ބޭނުންކުރާ ފަރާތްތަކުން އެހެނިހެން ބޭސްތަކަށް ބަދަލުކުރުމަކީ ރަނގަޅުކަމެއް ކަމަށް އެބަޔާނުގައި ވެއެވެ.
އެން.ޑީ.އެމް.އޭ އަކީ ގިނަ އަދަދަކަށް ބޭނުންކޮށްފިނަމަ ނުރައްކާތެރި މާއްދާއެކެވެ.
މިހާތަނަށް އެފް.ޑީ.އެން އަދި ބޭސް އުފައްދާ ކުންފުނިން ރެނިޓިޑިން އަނބުރާ ގެނެސްފަކާއެއް ނުވެއެވެ. ސަނޯފީ ކުންފުނީގެ ސްޕާކޮސްޕަރސަން ވިދާޅިވީ އެކުންފުނިން ބަލިމީހުންގެ ރައްކާތެރިކަމަށް ނުހަނު ބޮޑު ސަމާލުކަމެއްދޭ ކަމަށެވެ. އަދި މި މައްސަލާގައި އެފް.ޑީ.އޭ އާއެކީ މަސައްކަތް ކުރުމަށް ތައްޔާރަށް ހުރިކަމަށް އެބޭފުޅާ ވިދާޅުވިއެވެ. އަދި ސްޕާކޮސްޕަރސަން ވިދާޅުވި ގޮތުގައި ޒެންޓެކް ބޭހަކީ 10 އަހަރަށްވުރެ ގިނަދުވަހު މީހުން ބޭނުންކުރަމުން އަންނަ ބޭހެއްކަމާއި، އެބޭހަކީ ސަލާމަތީ ގޮތުން ހުންނަން ޖެހޭ ގަވާއިދުތަކަށް ތަބާވާ ބޭހެއްކަމަށެވެ.
މިދިޔަ އަހަރު އެން.ޑީ.އެމް.އޭ ވަނީ ލޭގެ ޕްރެޝާ އަދި ހިތުގެ ފެއިލިއާއަށް ބޭނުންކުރާ ބައިވަރު ބޭސްތަކެއްގައި ފެނިފައެވެ. މިބޭސްތައް މިހާރުވަނީ ބޭނުން ކުރުން މަނާކޮށް އަނބުރާ ނެގިފައެވެ.
އެފް.ޑީ.އޭ އިން އަދިވެސް މިމައްސަލަ ދިރާސާ ކުރަމުން އަންނަ ވާހަކަ ބަޔާން ކުރިއެވެ. އަދި އިތުރު މައުލޫމާތު ލިބުނުހާ އަވަހަކަށް ހިއްސާ ކުރާނެ ވާހަކަވެސް ބަޔާން ކުރިއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)